- Tula -

Pinupulot bawat letra,
Pinagtagpi-tagping mga salita,
kumakawala sa utak,
parang mga ibon sa ulap.

Bawat salita'y pinag-iisipang mabuti,
Kung ito ba'y babagay o hindi,
minsan kusa na lang nabubuo,
swak agad bawat dulo.

Bawat tula ay parang pag-ibig,
Hindi mo mawari kung bakit,
bigla bigla na lang lumilitaw,
nararamdaman mo'y kusang sumisingaw.

Katulad din ng isang balita,
kumakalat na lang bigla,
nakakarating saan mang kanto,
nililipad gamit ang bibig ng kung sino.

Parang buhay lang din natin,
minsan mahirap at minsan madali,
minsan masaya at minsan hindi,
hawak mo kung anuman ang mangyayari.

Tulad ng isang tula,
ikaw lang may kakayanan,
isulat ang iyong gusto o maisipan,
kung paano mo tatapusin ang nasimulan.



Gawa Ni: AK®

- Bigkas -

Pansin mo ba?
kanyang mga kataga,
kay sarap pakinggan,
pati kaluluwa'y napapalundag.

Susungkitin daw mga bituin,
para ika'y mapasaakin.
Lalakbayin ang pinakamataas na bundok,
mapatunayan lang na ikaw ang tinitibok.

Puso kong matagal nang naghahanap,
sinta kong kay tagal na pinangarap.
Marinig lang matamis na "Oo",
hinding hindi ka mabibigo.

Pagsinagot mo na,
ilang buwan ay maayos pa.
Malalaman mo na lang bigla,
matatamis na salita ay sinawalang bahala.

Pag-aktong iiwan mo na,
ayan na naman si makata.
Sisisirin daw ang karagatan,
huwag ka lang lumisan.

Hanep itong si Juan kung magsalita,
parang sasali lang sa balagtasan.
May paluhod-luhod pang nalalaman,
animo'y aktor sa pelikula.

Kaya ikaw huwag papadala,
mga matatamis na salitang bigkas niya.
Maaaring maganda sa iyong pandinig,
marami na rin pala kayong pinakilig.


Gawa Ni: AK®

- Bungad -

Sa bawat pagdating ng dapit hapon,
kasunod nito ay kadilimang babalot,
hindi ibig sabihing lalamunin ito ng lungkot,
dahil kinabukasan ay may liwanag na sasakop.

Ngumiti at harapin ang umaga,
sandaling manalangin at magpasalamat,
Panginoon naman kasi ang may alam ng lahat,
ibibigay naman sayo ang nararapat.

Kung di man maganda ang simula,
wag kang malugmok o madismaya,
manatiling positibo sa lahat ng gagawin,
sasaya ka rin kung iyong nanaisin.

Hindi naman kasi laging maginhawa,
dadaan ka rin sa hirap o problema,
isipin mo lang na ito'y pagsubok,
para lalo kang tumibay at hindi susuko.



Gawa Ni: AK®
05-02-11

- Eh Kasi Naman -

Sino ba ang may sabing mahalin ka?
kung alam ko namang may mahal kang iba.
Sinu ba ang may sabing magpakatanga?
kahit alam ko naman na walang mapapala.

Pero ayos na rin ang ganito,
mapansin mo lang masaya na ako,
kahit nga ngiti ay kontento na ako,
lalo pa kung ako'y lalapitan mo.

Hindi na ako hahangad pa ng sobra,
kasi alam ko namang hindi uubra,
kahit pa ilang beses magnovena,
kung ang laman naman ng puso mo ay iba.


Gawa Ni: AK®
05-01-11